حوزي طال نحبي

الجمعية الموسيقية ريــــــاض الأندلس

المهرجان الوطني لموسيقى الحوزي

الطبعة الثالثة

18 إلى 22 جوان 2009

حوزي من

كلام الشيخ ابن تريـكي رحمه الله

طـــال نحبـي

طَالْ نَحْبِي وَدْمُوعٍي كُــلَّ يُومْ زَرَّابْ			الفْرَاقْ كْـوَانِي كِيَّــة بْلاَ سْبَـــابْ
مَنْ سْمُومُو سَيَّبْ لِي فَالدَّلِيلْ الاشْهَـابْ			مَـا جْبَرْتْ لْضَرِّي حُكْمَة وَلاَ طَبِـيبْ
شَابْ رَاسِي يَا رَبِّي مَنْ فِرَاقْ الاَحْبَابْ			لله آجْمَـعْ شَمْلِـي يَــا المُرْتَقَــبْ
		بِهُمْ آجْمَعْ شَمْلِي نَزْهَى وَنَنْطَرَبْ
هَذَا الفِرَاقْ يَـا سَـايَلْنِـي مَضَّـانِـي			آجْـرَاتَ دَمْعَـتِي عَنْ خَدِّي طُوفَــانْ
الوَحْـشْ كُـلَّ يُومْ آيْـقَـوِّي نِيرَانِـي			آنْهِيـجَ بَآلبُكَــا وَنْجَـدَّدْ الآحْــزَانْ
بَاطَلْ آبْغِيـرَ سَبَّـة وَدَّرْتْ زْمَـانِـي			هَايَـمْ آذْلِيــلَ نَتْلَـجَّ فِي الأَوْطَــانْ

مَظْلُومْ آعْذْرُونِي فِي الفُرْقَة يَا آهْلَ المْحَبَّة			طُـولْ عُمْرِي وَآزْمَانِـي مُفْتَرَدْ غْرِيبْ
يَـا حْباَبِي مَا بَعْدْ امْصِيبَتِي آمْصِيبَـة			خَـابْ سَعْــدِي شْلاَّ ظَنِيتُـو يَخِيـبْ
كُرْبَتِي دُونْ النَّاسْ اتْفُوتَ كُـلَّ كُرْبَـة			خَفْت يَعْدَمْ جَفْنِي مَنْ كُثْـرَتَ النَّحِيـبْ
هَاجْ ضَرِّي وَآنْحَرَمْ نَوْمِي آنْغَلَبْتَ غَلْبَة			صَرْتْ نَتْلاَطَمْ فُوقْ النَّارْ وَاللَّهَـــبْ
آهْ يَــا تَهْـوَالِي نَارِي تَظَـلْ لَهَّـابْ			خَابْ ظَنِّي مَا نَعْرَفْ وَاشْ هَذَا العَجَبْ
حَـالْتِي لاَ حَالَة وَالقَلْب بَالهْوَى طَـابْ			نَـصْبَـرْ لله آنْـوَدِّي فِيمَـا كَـتَـبْ
		بِهُمْ آجْمَعْ شَمْلِي نَزْهَى وَنَنْطَرَبْ
حَـالِي وَقَصَّتِي نَحْكِي مَنْهُ جَــانِـي			خَـايَفْ مْنَ العَـدَا وَبْـرِيحْ الدِّيـوَانْ
وْلاَّ نَصِيرَ قَـاهَـرْ اَفْيَـدَّ آنَصْرَانِـي			بَسْلاَسَـلُ و آمْغَلْغَلْ افْيَـدَّ الخُزْيَـانْ
هَمَّ الجَفَـا رَوِيتُـه عَـنْ كُلْ آمْعَانِـي			يَنْفِــي لمَالْـطَة وَبْـلاَدَ السُّـودَانْ

لِيكْ نَشْكِي بْأَمْـرِي يَا عَالَمْ الأَسْـرَارْ			يَـا الوَاحَـدْ وَحْدُه يَا رَافْعَ الضَّـرَرْ
فِيدْنِي وَآرْحَمْنِـي أَيَّـاكْ تَبْرَد النَّــارْ			يَـنْشَرَحْ الخَاطَرْ مَنْ لِيعْـةْ الفَـكَـرْ
نَرْتَجَى وَآنْرَاقَب الخْبَارْ اللِّيلْ وَالنْهَـارْ			طَـال بِيَّ ذَا الحَـالْ اعْيِـيت نَنْتَظَـر
وَآحْتَرَم نَومِي فِي الدِّيجَانْ صَرْت سَاهَرْ			النُّجُـومْ آنْرَاقَـب وَمْـنَـازْلَ القَمَـرْ
بَاحَ سَرِّي مَنْ لَوْنِـي وَآنْفْضَحْ بَصْوَابْ			يَا دْرَى صَرْ تْ نَحْكِي لْيَعْقُوب بَكْثِيرَ النَّحَبْ
يَا دْرَى نَسَّـارَى وَنْطُوفْ بِينْ الآدْرَابْ			أَوْ نَبْقَـى هَـايَم فِي قْبَايْـلَ العَـرَبْ
	بِهُمْ آجْمَعْ شَمْلِي نَزْهَى وَنَنْطَرَبْ
رَبِّي كَتَّـبْ عَلِيَّ بَالوَحْـشْ آبْـلاَنِـي			مَـا فَـادَنِي بُكَـا اوْلاَ زَالْ آتَـدْوَانْ
حُزْنِي عْلَى مْسِيـدَ المَعْـدَة بَكَّـانِـي			بَاهْوَاهْ صَـارْ لَوْنِي مَثْـلَ اليَرْقَـانْ
الوَحْشَ زَادَنْـي مَنْ أَهْلِـي وَآخْوَانِـي			فِي كُلَّ يُومَ دَمْعِي يَجْـرِي طُوفَـانْ

آشْ صَبَّر قَلْـبِي يَا عَـارْفِين الأَمْثَـالْ			هَـاجَ ضَرِّي وَآهْلَ الحِكْمَة يْطَوَّلُـوا
مَا خْفَى شِي حَالِي فَانِي آنْحِيلْ مَدْبَـالْ			مَـنْ اهْمُومِي مَنْ جِيـرَانِي تْهَوَّلُـوا
وَالغْرَامْ امْلـَكْنِي وَانَا فْشَـدَّ التَهْـوَال			فَـاكْنَـانِي سَبَّـبْ نِيـرَانْ يَشْعَلُـوا
ذَا الحْبِيبْ آهْجَرْنِي وَعْلَى الجْفَا لاَ زَالْ			خَاطْرِي مَتْغَيَّرْ دُونَ اللِّقَـا يْـنَالُـوا
مَثَّلْ لَوْنِي يَا سَايَلْنِـي بْصِفَة الغْـرَابْ			مَرْتْمِي فِي القُطْرَانْ وْصَارْ يَنْقَلَـبْ
وْلاَّ لِيلَ مْظَلَّمْ شَاتِي بَرْيَاح وَآسْحَـابْ			يَا دْرَى يَزْهَى لِي حَالِي وَنَنْطَـرَبْ
	بِهُمْ آجْمَعْ شَمْلِي نَزْهَى وَنَنْطَرَبْ
مَنْ لاَ ذَاقْ آفْرَاقْ الأَحْبَابْ مَشْرُوحْ وْهَانِي			لاَ تَعَبْ لاَ شَقَا اَوْلاَ خَاطَرْ حَيْـرَانْ
اِذَا يْكُـونْ مَثْـلِي لاَ بُدَّ يَلْقَانِــي			يَفْـنَى وَيَنْهَلَـكْ وَيْبَـدَّلْ الاَلْـوَانْ
مَـرَّةْ يَكُـونْ زَنْجِي مَرَّةْ يَرْقَـانِـي			مَرَّة يَكُـونْ فِي القًُرْمَزْ وَالنُّعْمَـانْ

طَالَتْ الغِيبَـة عَنِّي وَالتَّعَبْ وَالنَّكَـدْ			رَاهْ جَسْمِي مَثْلَ المَضْرُوبْ بَالحَدِيدْ
وَالغَـرَامْ عْلِـيَ افْكُلَّ يُومَ يَــزْدَادْ			ضَرَّنِي وَاهْلَكْنِي وْلاَ صَبْتْ لُو سَنِيدْ
تَـارَة اَنُّوحْ اَوْ تَارَة نْجِيبْ الاَنْشَـادْ			مَـا يْبَرَّدْ النَّـارْ اِلاَّ غْنَا القَصِيـدْ
صَـرْتَ صَابَرْ لله فِيمَا قْضَـى وْرَادْ			آشْ يَجْمَع شَمْلِي بَالدَّرْبَ وَالمَسِيـدْ
قَلَّ جَهْدِي فِيدُونِي يَا اشْرَافْ الأَنْسَابْ			الجْوَارَحْ طَابُوا وْخَاطَرِي آنْضَرَبْ
لُوحْكِيتْ هَذِي القِصَّة لَلْحَدِيدْ يَرْطَابْ			لُو شْكِيتْ لَلْحَجَرْ الجَلْمُودَ يَنْتَقَـبْ
	بِهُمْ آجْمَعْ شَمْلِي نَزْهَى وَنَنْطَرَبْ

تابع حوزي

(ميزان بروالي)

أنَـَا هُوَ حْزِيـنْ و انَـا قَيْسَ الثَانِـي		و انَـا الـلِّي نَرْوِي فَلَرْضْ العَطْشـَانْ
لَوْ كَانْ مَنْ اشْرَبْ وَاحَدْ مَنْ كِيسَانِـي		طُـولْ الزْمَـانْ يَبْقَى هَـايَمْ سَكْـرَانْ
يَفْـنَى وَ يَنْهْلَـكْ امْـنَ النِـيرَانِـي		اوْ لُو يْـكُونْ هُوَ عَفِـرِيـتَ الجَــانْ

اتْخَيّـَلْ يَا حْمَـامْ جَمَّـلْ وَاسْعَانِـي		وَ اعْمَـلْ اجْمِيـلْ فِي يَـا وَرْشـَـانْ
نَكْـتَـبْ البْـرَا وَصَّلْهـَا لاخْوَانِـي		فِي مْـدِيـنَةَ الجِـدَارْ ابْـلادْ تْلَمْسـَانْ
وِلَـى وَصَلْـتْ انْـتَ غُرِّي بَرَّانـِي		سَقْـصِ اعْلَى مْسِيـدَ المُعْـدَة تَعْيَـانْ

تابعه مخلص

يَـا حْمَامْ اصْغَ لَكْلامِي وْ كُنْ ثَبَّــاتْ		وَ افْهَمْ المَعْنَى وَ اعْرَفْ نَعْتَ الحْدِيـثْ
سَلَّـمْ اعْلَى حُومَةْ بَابْ الجْيَادْ بَثْبَـاتْ		كُـلْ وَاحَدْ وَحْدُو وَاجْمِيـعْ مَنْ لْقِـيتْ
عَنْدْ سِيدَ القَـلْعِي تَمَّ اتْصِيبْ سَـادَاتْ		سِي ابْرَاهِيمْ قُل لُّو مَرْسُولْ لِيكْ جـِيتْ
بَالْفَ اسْلاَمْ امْزَكِي مْنَ اشْعَارْ الابْيَاتْ		سَلَّـمْ اعْلَى بَنْ عِـيسَى قْدَرْ مَا قْوِيتْ

سَلَّمْ اعْلَى الحُومَه وَاجْمَاعْتِي وَ الاصْحَابْ		بَالمْعَانِـي عْلَى الاحْبَـابْ وَ النْسَـبْ
عِدْ حَالِي لاحْبَابِي يَا ظْرِيـفْ الاهْدَابْ		يَنْظْـرُوا مَا قَاسَى قَلْبِي وْ مَا شْـرَبْ
شَابْ رَاسِي يَا رَبِّي مَنْ فِرَاقْ الاَحْبَابْ		لله آجْمَـعْ شَمْلِـي يَــا المُرْتَقَــبْ
بِهُمْ آجْمَعْ شَمْلِي نَزْهَى وَنَنْطَرَبْ

تَـمْ نَظْميِ بَالفَرْقـَة يَا اهَْل الوْلاَعَـة		اعَذْرُوا حَالـِي يَا الاحْبَابِ الاَّ نْضِيـعْ
طُولْ عُمْرِي فَازْمَانِي مَا غْنَمْتْ سَاعَة		وَ الـلْسَـانْ اهْلَكْنِي بَكْلاَيْمُـو سْرِيـعْ
رَدْ بَالَـكْ وَاصْغَ يَا صَاحْبَ الجْمَاعَة		مَنْ فْرَاقَ احْبَـابِي يَـا حَامَلْ القْطِيـعْ
هَكْذَا قَـالْ احْمَدْ يَـا فَـاهَمْ البْرَاعَه		اعْلىَ التْرِيكِـي رَحَّمْ تَرْحَمْ بَـالجْمِيـعْ

يَـرْغُبْ الله ابْجَـاهَ النْبِـي اوْ لَقْطَابْ		تَجْمَعْـنَـا فَـاقْصُـورْ مَـنْ اذْهَـبْ
بَعْدْ سَتِينْ اوْ أَلْفْ زِيدْ الجِيمْ نُقْطَه وَ احْسَابْ		قَيَّـدَ التَّـارِيخْ افْعَشْرِيـنْ مَنْ ارْجَـبْ
شَابْ رَاسِي يَا رَبِّي مَنْ فِرَاقْ الاَحْبَابْ		لله آجْمَـعْ شَمْلِـي يَــا المُرْتَقَــبْ
بِهُمْ آجْمَعْ شَمْلِي نَزْهَى وَنَنْطَرَبْ